ትዕግስቲ ዶስ ፍርሒ ?

ሙሉጌታ በሪሁን፤ መጋቢት 25 2017 ዓም፤ ካብ ካናዳ

ዘሕፍር ወለዶ 40ታት፣50ታት፣60ታትን፣70ታትን እዚ ወለዶ እዙይ ብግልፂ ኣዘራርባ ካብ ወዲ ጓል (40)ዓመት ንላዕሊ ዘለና ንባዕለይውን ሓዊሱ፣ኣብ ትግራይን ብ ሕዝባን ንልዕሊ 40 ዓመት ንዝወረደ ክሕደት፣ጥልመት፣ዓፈናዊ ስርዓት፣ሕገ መንግስታዊ ጥሕሰት፣ትግራይ ንዝወረዳ ስርዓታዊ፣ ሃይማኖታዊ፣ ባህላዊ፣ ታሪካዊን ማሕበረሰባዊ ውድቀታት ኩሉ ተሓተቲ ኢና።

ዓድና ትግራይ ከም ፈላሞት ወለድና፣ ከምኒ ንጉስ ካሌብ፣ ከምኒ ንጉስ ኢዛና፣ ነገስታት ኣብርሃ ወኣጽብሃ ከምኒ ሃጸይ ዮውሃንስን፣ ራእሲ ኣሉላን እናበልና ንጃሃር፣ ንፍክር፣ ዕቡያት፣ ውድቀትና ኣብ ዓይንና እናራኣይና፣ ውድቀትና ንኻልኦት ብሹም ጸላእቲ ነሸክም ሻዕብያዬ፣ናይ ኣምሓራ ልሂቃንዬ፣ፋሽት ኣብይ ኣሕመዴ፣ እናበልና ርስሃትና ኣምባገነናዊ ምህደራና፣ፍልጠት ኣልቦ ደንቁርናና ዘይንቅበል፣ዘይንኣምን ሰብ ጸሊም ታሪኽ ኢና።

መን ከማና፣ ጃህራ ስንቁ ትግራዋይ፣ ብድዐ መርኣይኡ ትግራዋይ፣ ሓሶትን ስርቂን መግለፂና ተጋሩ ብናይ ወለድና ታሪኽን፣ ጀግንነትን ካብ “እንብጥረቅ” ? እቲ ንልዕሊ 40 ዓመት ዝኸድናዮ ኣንፈት ውድቀት ዝብናን፣ዓድናን እዩ መግለፂ መሪሕነትና።

እዙይ እዩ እቲ ሓቂ ! ዕሉላት ኣምባገነናት ኢና።

ደቅና ዘይንኣምን ደናቁር ኢና። ወዲሰብ ካብ ውላዱ ንላዕሊ ዳኣ ንመን ይእመን እሞ ድማኮ ደቅና ካባና ንላዕሊ ዝተማህሩ።ካባና ንላዕሊ ዓለም ዝርድኡ።ካባና ንላዕሊ ሳይንስን፣ቴክኖሎጂን ዝመለኹ እሞ ድማ ብግብሪን፣ብሓዊን ተፈቲኖም ስዒሮም መሰስ ዝበሉ ደቅናኮ ዋላ ሓንቲ ምልክት ውድቀት ዘየርኣዩና፣ዕድል ዘይረኸቡ ጀጋኑኮ እዮም።

ንዓና ንኣያታትን፣ ኣዴታትን ልዕሊ 40 ዓመት ዘለና፣እዚ ሎሚን ንዝሓለፉ 40 ዓመታት ዝተኸተልናዮ ስርዓትን፣ ሓደሽ ደሽ ዘበልናዮ ባህላዊን፣ ሃይማኖታዊን ኽብርታትና እዩ መግለፂና።

ስርዓትን ሕጊን ተኺልና፣ መሰል ዜጋታት ንኽሕለዉ ሕገ መንግስቲ ኣጽዲቅናን፣ ኮይኑ ግን ? ብግብሪ ዘይቱርጎም፣ ናብ ባይታ ዘይወርድ፣ ናይ ወረቀት ሕጊ ሒዝና፣ ሎሚ ሕጊ እናተጣሕሰ፣ እቲ ዝጣሓስ ሕጊ ድማ ባዕልቶም እቶም መራሕቲን፣ ሳዓብቶምን ዝተሓርደ ስጋ ዝሰርቅ መሕፈሪ፣ ኣባል ሰራዊት፣ሎሚ ካብ ዝሓመመ ሕጻን ዘይቲን፣ፊኖኖ ዝሰርቅ ሓላፊ፣ ሎሚ ብመስዋእቲ መናእሰይን፣ ዋዕሮታት ደቁን ዝተማረኸን፣ ዝተቃፀለን ሓፂን መፂን ዝሸይጥ፣ ጀነራል በሎ ኮረኔል ዘይሓትት ስርዓት፣ ሎሚ መሬት ሃፍተ ገነት፣ ማኣድናትን ወርቂ ዓድን ዝጉሕጉሕ ስሱዕ ጀነራል ኮነ ኮረኔል፣ ናብ ሕጊ ዘየቅርብ ስርዓት፣ ከምዝተኸልና ኽንርስዕ የብልናን።

ሕጊ ንዘኽብሮ እምበር ? ስለ ዝፈከርካሉ ሕጋዊ ቅቡልነት ይህበካ/ኺ ማለት ኣይኮነን። ታሪክና ኾላይ 3ሺሕ ዶ 4 ሺሕ እናበልና ኣይንጃሃረሉ፣ኣይንፈክረሉ።

ትማሊ ናይ ወለድና ታሪኽ እዩ። ሎሚ ኣብ ግዜና ዝሃነጽናዮን፣ዘልማዕናዮን፣ዝኣጎድናዮ ሓዊን ዝጭበጥ ታሪክና እዩ። ቅድሚ 3ሺሕ ዓመት ሕዝቢ ትግራይ ብጽምዲ ብዕራይ እናሓረሰ ኸምዘይ መጸ ? ሎሚ ሓረስታይ ትግራይ “ብጽምዲ ብዕራይን ኣድጊን” “ብጽምዲ ብዕራይን ፈረስን” ብጽምዲ ብዕራይን እንሰሳን ናብ ዝሓርሰሉ ብርኪ ዘዉረድና ድሑራት፣ናይ ውረቀት ሙሁራት፣ብግብሪ መነባብሮ ዝብና ዘይቀየርና ኢና።

ሕድሪ ስዉኣትና ኣይነዕብርን እናበልና፣ብስውኣትና እንሽቅጥ፣ መሕፈርቲ ወለዶ፣ ሰብ ጸሊም ታሪኽ ሕዝቢ ትግራይ ኢና። እዙይ እዩ እቲ ሓቂ። ኣንታ መንእሰይ ወለዶ፣ ትግራይ ኣያታትካን፣ኣዴታትካን ብብድዐ ሎሚ ስለ ዝጠለሙኻ ? ስለ ዘይኣመኑኻ ዋላኳ ብተስፋ ምቁራጽ ጻርጻር እንተበልካ ? እቲ ዋና ድሌቶምን ሸርሖምን መሚኻ ተረዳኣዮ።

እታ እንኮ ድሌቶም ኣማሪርካ፣ ተስፋ ቆሪጽካ፣ ዓድኻ ራሕሪሕኻሎም ኽትከይድሞ ? ንዕኦምን ንተሸከምቲ ሻንጥኦምን፣ንስድርኦምን እትኸውን፣ንሳቶምን ስድርኦምን ኣራጢጦም ዝግህጽዋ ትግራይ ኸማቻችዉ እዩ ቀንዲ ድሌቶም። ንሳቶም ሎሚ ንዓኻ ካብ መረበትካ ኣባሪሮም፣ ደቆምን ስድርኦምን ፎቆዶ ኣውሮፓ፣ ኣሜሪካ፣ ኣውስትራልያን፣ ዱባይን ኣቀሚጦም እዮም ዝብና፣ጅግና ዝብና፣ውፈር ተበገስ፣በሎምዬ እናበሉ፣ ብስምዒትካ እናላገጹ፣ ከም በጊዕ ዘሕርዱኻ።

ወዲ ድኻ ሓረስታይ ሞይቱ፣ ደቂ 20 ዕሸላት እናሞቱ ደቂ 60፣ 70፣ 80 ኣሳፊሖም ኽነብሩ ? እዩ ሕልሞም። መንእሰይ ወለዶ ሕበር፣ ስመር፣ ተወደብ፣ ተቃለስ ስልጣን፣ መሪሕነት እንካ ዒሉ ዝህበካ የለን። ተቃሊስኻ/ተቃሊስኺ ውሰድዎ።

መራሕቲ ትግራይ ንልዕሊ 30 ዓመት፣ካብ መሬት ትግራይን፣ ካብ ዳያስፖራን ብዝዘረፍዎ ሃፍቲ ማሓዉሮም፣ ስለልኦም፣ዋላ ቀሊል ኣይኹን እምበር ? እዞም መራሕቲ እዚዖም ዝነግሩኻን፣ዝገብርዎን ፍጹም ዘይራኸብ ከም “ጸሊምን፣ጻዕዳን” ተቃራኒ ግብሪ እዩ። ጽባህ ድማ ከም ሓለይቲ ንዓዶም፣ ግዱሻት ተጋሩ ተባሂሎም ኢንቨስተራት ኮይኖም ደበኽ ክብሉልካ እዮም።

ኽቡራት መንበብተይ ሎሚ እዚ ኹሉ ግፍዒን፣መከራን ኣብ ህዝብና እናወረደ ? ፍጹም ሕዝባዊነት የለን። ዝብና ይሳቀይ ኣሎ፣ መሰሉ ይተሓሎ፣ ፍትሒ ይንገስ፣ ለውጢ የድልየና እዩ። ኢሎም ኣብ ኣጋ እርጋኖም ሙርኩስ ሒዞም ምስቲ መንእሰይ ወለዶ፣ መሪሖምን ተቃሊሶምን፣ ሎሚ ኾላይ ብትብዓት ዝቃለሱ ዘለዉ ኣያታትካ፣ ጀነራላትካ፣ ኮረኔላትካ፣ ፖለቲከኛታትካ፣ ከየንትኻ፣ ጋዜጠኛታትካን፣ ሙሁራትካን እሂን ምሂን ኢልካ ተማያየጥ፣ ተወደብ፣ ስምዓዮም፣ኣኽብሮም።

እቶም ብሹምካ፣ብመስዋእቲ ብጾትካ ዝሽቅጡ ሰብ 2 መልሓስ ከም ዶሞቶራ ብውድቀቶም፣ ብውጽኢታዊ ስርሖም ተቃለሶም። ኣውግዶም። እምቢ በሎም። እዞም ጠላማት መራሕቲ ፖለቲካ። ሙሁራት መሰል ርእሲ ኣልቦ። እዞም ንይምሰል ሕዝባዊያ ጀነራላት፣ኮረኔላት ብዝወስድዎ ስጉምቲን፣ናይ ሚዲያ ፕሮፓጋንዳን ከየታልሉኻ፣ ሎሚማ ኽሳብ ዓፈናን፣ፈተነ ቅትለትውን ጀማሚሮም ኣለዉ ይባሃል ሎ። መንእሰይ ትግራይ ከም መዘኻኸሪ ክኾነካ ውድብ ህወሕት ብ67ዓ/ም እንትምስረት እንተሎ ብሓቀኛ መሁራት፣ ሰብ ዕላማ፣ ደለይቲ ለውጢን “ቤዛ ሕዝቢ” ክኾኑ በረኻ ወሪዶም መብዛሕቲኦም ተሰዊኦም እዮም።ፍርቆም ድማ ብመራሕቲ እቲ ውድብ ዝተፈለዬ ሓሳብ፣ዝነበሮም ዝተረሸኑን፣ ዝተባረሩን ከምዘለዉ ብውልቀይውን እፈልጥእዬ። እዚ ውጥም ቅልቅል ዝብል ዘሎ ንሕና ምስ ጉባኤ ዝገበረ ህወሓት ዒና እትባሃል ላግፂ፣ እቶም ካብ ኮር ንላዕሊ ኣዘዝቲ ኢና ኢሎም ዘሕለፍዋ ውሳነ፣ቀጥታ ምልክት ክሕደት ሕዝቢን፣ ቀጥታ ምስቲ ደላይ ለዉጢ መንእሰይ ወለዶ እተራጽም እያ።

ልክዕ እዩ፣ካብ ምሕላው ጤለ በጊዕ ኣውጺኡ ናብ ዝይምጥነካ ሓላፍነትን፣ ስልጣንን ዘደየበካ ጎይታኻ ምቅዋም፣ ከም ክሕደት ኽመስል ዋላኳ እንተኻኣለ፣ ካብ ፈለምኡ ውን፣ ብሕዝባዊ ሓልዮት ዘይኮንካስ፣ ብጊላነትን፣ ሕሽክርናን ዝግዛእ ዝነበረ ዓቀይታይ ጎይትኡ ምጥላም ከቢድ እዩ። መንእሰይ ወለዶ ትግራይ “ጭራ ነብሪ ኣይትሓዝ፣እንተሒዝኻ ድማ ኸይትለቅቅ”እንትትለቆ ዜሩ ኽበልዓኻ እዩ። ከይትምብርከኽ፣ ከይትፈርሕ፣ ተወደብ ተቃለስ፣ እምቢ በል።

ሎሚ ብስንፍናኻ ካብ ኢድኻ ዝወጽእ ከይዲ ለውጢ ጽባሕ መቅተሊኻ፣ መእሰሪኻ፣ መሰደዲኻ እዩ ክኸውን። ካብ መንእሰይ ኤርትራ ተማሃር፣ካፍቲ ከርፋሕ ሕሱም ናብራ ምልኺ ሻዕብያ ተማሃር። ስብሓት ነጋ፣ ንኢሳያስ ኣፈወርቂ “ብፃይ ኢሳያስ” እናበለ እዩ ዝጽዎኦ። ብኸመይ ? ሕሰብ

መራሕቲ ህወሕት ዝነበሩ እኒ ኣባይ ጽሃዬ፣ እኒ ኣምባሳደር መስፍን፣ እኒ ኣባይ ነብሶ ንምንታይ ተረሺኖም ?ሕሰብ፣ ጠይቅ፣ ነገራት ገጣጥሞም ስብሓትን ቅዱሳን ነጋን፣ ቴድሮስ ሓጎስን፣ እኒ ኣባይ ወልዱን ከ መራሕቲ ህወሕት ዶ ኣይነበሩንዮም ? እሞኸ ዳኣ ? ሕሰብ ጠይቅ

ኣብ እዋን መኸተ ጀነራል ጻድቃን፣ተጋዳላይ ተወልደ፣ዶ/ር ሙሉጌታ ጫልቱ በእንተ ሕዝቦም ብሙርኩስ ተቃሊሶምስ, ብውድብ ኣይተኣመኑን። እሞ ኣማኑኤል ኣሰፋ ድዩ ካብ ዝተሓብዐሉ ሞጎጎ ወፂኡ ንትግራይ ኣድሒንዋ ? ወይስ ዶ/ር ሰለሞን ኪዳነ ሙሩኽ እናሃለወ ካብ ወ/ሮ ኬሪያ ዝሓሸ ሙሩኽ ኮይኑ ? መንእሰይ ወለዶ ሕሰብ፣ ጠይቅ፣ እምቢ በል፣ ብዝመረጽካዮ መንገዲ ተቃለስ። ትዕግስትኻ ወሰን ይሃልዎ። ቀስ ብቀስ ማሓውሮም ንኸየጠናኽሩ፣ ናይ ባዕልኻ ውዳበ ምስቶም ጀጋኑ መናእሰይ ኣባላት ሰራዊት ተላዘብ። 

ወለዶ 40ታት፣50ታት፣60ታትን፣70ታትን ብሓፈሻ ልዕሊ (40)ዕድመ ዘለና ኣቦታት ንኹን ኣዴታት፣ መርኣያ ውጽኢትና ትግራይ ካብ ድሑር ዘመነ መሳፍንት ? ናብ ዘመናዊ “ስርዓታዊ ባርነት” ኢና ቀይርናያ፣ ኣነ ኾላይ ናይዚ ደንቆሮ፣ ዕቡይ፣ ጠላም፣ ደቁ ዘይኣምን፣ ገባጣይ ወለዶ ኣካል እዬ። በዙይ ድማ እሓፍር።

ፖለቲከኛ እዬ በል/በሊ፣ሙሁርዬ በል/በሊ፣ሃፍታምዬ በል/በሊ፣ዋጣ እዬ በል/በሊ፣ጋዜጠኛ እዬ በል/በሊ፣ጀነራልዬ በል/በሊ፣ኮረኔልዬ በል/በሊ፣ንደቅና ንደቂ ደቅና ዘይንኣምን ? ጠላማት፣ከዳዓት፣ብሞት ዕሸላት ደቅና፣ ብዓመጽ ዋዕሮታት ደቅና፣ ብመከራን ሽግርን ዝብና ዘይንግደሽ ? ሓሰውቲ፣ ስሱዓት፣ ወሽጣዊ ዓርሰ እምነት ዘይብልና፣ ሰብ ጸሊም ታሪኽ ኢና።

ይሓይሽ እንተበልናስ ዝገደደ። ትግራይና ድሕሪ ሰኔ 21 ካብ ዝሓሸ ናብ ዝገደደ፣ መጨረሽታ ዘይብሉ ብሜላ እናተናውሐ ዝኸይድ ዘሎ ደልሃመት፣ ስነልቦናዊ ማሕሰይቲ፣ኢኮኖሚያዊ ውድቀት እናተረግረገት ትኸይድ ኣላ። እዚ ኸይዲ እዙይ ንሓፋሽ ናብ ዝኸፍዐ ማሕበራዊ ቅልውላውን፣ናብ ሕዝባዊ ድኽነትን፣ ጀጋኑ መናእሰይና፣ ሙሁራትንን፣ብሓፈሻ ዓዲ ክሃንጹ ይኽእሉ እዮም ? ኢልና እንኣምነሎም ደቅና ብስደት ንስእን ኣለና።

በቲ ኻልእ ገጽ ድማ ? ትማሊ ኣብ እዋን መኸተ ተሓቢኦም፣ ዝነበሩ ሰብ ሃፍቲ፣ ፈራሓት ደቂ ሰበ ስልጣንን፣ ኣብ መሪሕነት ዝርከቡ ሓለፍቲን፣ ውሑዳት ሓለፍቲ ሰራዊትን ደቆምን ድማ ? እዚ ዕድል እዙይ ተጠቂሞም ኣብ ምእካብ ሃፍትን፣ ኣብ ሓደግትን፣ገበርትን ሓላፍነት ሕዝባዊ መስራቤታትን ተሸይሞም ንሕዝቢ ሓሳረ መከርኡ የርእይዎ ኣለዉ።

ከምዝፍለጥ ኣብ ሓደ ሃገር ለውጢ እንትመጽእ ? እቲ ዝነበረ ስርዓት ኣወጊድካ ሓዱሽ ሕዝባዊ ቅቡልነት ዘለዎ ስርዓት ዋላ ንግዚኡ ይጣየሽ እሞ፣ እናዋዓለ እናሓደረ ስልጣኑ እናደላደለ ክኸይድ እንተሎ ? እቲ ሕቡእ ኣምባገነናዊ ባህርያቱ ይጅምር። እዙይ ኣብ መብዛሕቲኤን ሃገራት ዓለም ዝራኣይ ከይዲ ለውጢ እዩ። 

 ንምሳሊኡ ናህና ናይ ኢትዮጲያ በቀሊሉ ምርኣይ ይኣክል እዩ።ደርጊ ንሃይለስላሴ ገርሲሱ ስልጣን ምስ ሓዘ ዕሉል ወታደራዊ ኣምባገነን ኮይኑ። ህወሕት (ኢሕኣዴግ) ንደርጊ ኣወጊዱ ስልጣን ምስ ሓዘ ሜልኡ ቀይሩ፣ካብ ደርጊ ብዝተፈለዩ ቃላትን፣ሓደ ሓደ ምልክት ልምዓትን ብምርኣይ፣ እቲ ተቃሊሰሉ ዝብሎ ዝነበረ ዲሞክራሲን ሕዝባዊነትን ሓዲጉ፣ ብሹም ዲሞክራሲን፣ሕዝባዊነትን ዓፋናይ ኣምባገነን ኮይኑ ርኢና።

ብልፅግና ዝባሃል ኣወዳድባ ድማ ካፍቶም ዝሓለፉ ጨካናት ገዛእቲ፣ ብፍልይ ዝበለ ናይ ባዕሉ ኣንፈት መፂኡ፣ ዓዲ ደም ብደም፣ዄናት ብዄናት ጌርዋ።እቲ ዝገርም ግን እዞም ትግራይ ንልዕሊ 30 ዓመት መሪሖም፣ መጨረሽታ ዕጫ ትግራይ ድማ ዄናትን፣ወድቀትን ዘሸከሙና መራሕቲ ህወሕትን፣ ናይ ህወሕት ኣዘዝቲ ሰራዊትን፣ ብሹም ሕዝቢ ትግራይ እናማሓሉ እናተገዘቱ፣ ንትግራይን ሕዝባን ካብ ድኽነት፣ ናብ ዝኸፍዐ ድኽነትን፣ ስደትን ጥራሕ እዮም እናእትዉና መፂኦም።

እዞም መራሕቲን ኣዘዝቲ ሰራዊትን ትግራይ፣ ካብ ሕሉፍ ውድቀቶምን፣ጌግኦምን ኽማሃሩ ዘይኽእሉ፣ ሕንከት ዝባሃል ተፈጥሮኣዊ ጸጋ፣ ስብእና ዘይዓደሎም ወለዶታት ኮይኖም እዬ ረኪበዮም። 

ሎሚ ድማ መሬት ትግራይ በቲ ውዕል ፕሪቶርያ እንተይተተግበረ፣ ናብ ሰራዊት ዕጥቂ ምፍታሕ ይኣትዉ ኣለዉ። ወዮ ዳኣ ሰማዒ ተሳኢኑ እምበር ? መራሕቲ ህወሕትን፣ሻዕብያን ናይ ሓንቲ ሳንቲም ኽልቲኤን ገጻት እዮም። ብዝኾነ ይኹን መለኽዒ ብሹም ሕዝቢ ዝምሕሉን፣ ዝጥሕሉን፣ ንይምሰል ከም ጸላእቲ ብሚዲያን ብፕሮፓጋንዳን ኣንጭዋን ድሙን እናኾኑ፣ ብዕላማ ናይ ሓባር ውሽጣዊ ስምምዕነት ዘለዎም፣ ብሄረ ኣግኣዝያን በታቲንካ፣ ኣድኺኻ፣ ኣደንቂርካ፣ ብስነልቦንኡ ዝወደቀ ማሕበረሰብ፣ዓዱ ዘይፈትው፣ ማንነቱ ዝጽየፍ፣ ኽብርታቱን ጸግኡን ኣህሲስካ። ትግራይ ትግርኚ ብዘበነ ሻዕብያን፣ዘበነ ህወሕትን ከም ዝተፈጥረ ? ሓዱሽ ማንነት ሂብኻ ምግዛእ እዩ ሓበራዊ ዕላምኦም።

ሎሚ ድማ ኽሞጋገሱ ይጀማምሩ ኣለዉ።ትማሊ ዘርእና ኸጥፍእ ? ምስ ዝወፈረ ሻዕብያ፣ ኽንዘራረብን ኽንሰርሕን ጀሚርና ኣለና። ኢሉና እቲ ናብ ጀኖሳይድ ዘእተወና መራሒ። ብወገን ሻዕብያ ኾላይ ምስ ሕዝቢ ትግራይ ሓቢርና ጸላኢና ኽነውግዲና ይብሉ ኣለዉ። ደቂ ጀነራላትን፣ደቂ መራሕቲ መንግስቲን፣ ደቂ ሃፋትምን ንኣውሮፓ። ደቂ ምስኪን ሓረስታይን፣ ደቂ ድኻን ናብ ሓዊ። መን ኽሞቆ ? መራሕቲን ጀነራላትን፣ መንእሰይ ትግራይ ሎሚ እቲ ምስ ድኽመቱ ለወይ ለወይ ዝብል ዘሎ ለማስ መሪሕነት “ግዚያዊ መንግስቲ” ደጊፍካ። ሓሊኻ እተን ዝተዋሃብኦ ዕማማት ኽዛዝም እንተዘይ ሓጊዝካዮ ? ብኒ ጀነራል ኹስቶን፣ ወ/ሮ ኹስቶን ተኣማሚንካ ? ሓላፍነትካን፣ ግዴታኻን፣ ብሩህ መፃኢ ዕድልካን፣ ደቅኻን እንተዘይ ኣውሒስካ ? እመነኒ ድሕሪኡ ነዞም ኣረግቶት ሓለፍቲን፣ ቆራዲድ መጠጥቲ ደም ሕዝቢ ትግራይ ዝኾኑ ሰብ ሃፍቲን፣ ሎሚ ዝውረር ዘሎ ወርቂ፣ ጽባሕ ብሹም ኢንቨስተራት ዝመጹኻ ዳያስፖራን ? ብቀሊሉ ኣይክትስዕሮምን፣ሓይልኻ ምስ በታተኑኻ፣ ኣይክትውደብን፣ ኣይክትሓብርን፣ኣይክትሰምርን፣ ሎሚ ኩሉ ኣብ ቅድሜኻ እዩ ዝንሄ። ባርነት ወይድማ ሙሉእ ነጻነት፣ፍትሒ፣ ተሓታትነትን ዲሞክራሲን።

ፍትሒ፣ርትዒ፣ሰላም ዲሞክራሲ ብሰላም እንተዝርከብ ? ጽቡቅ፣ ኣብ ውሽጢ ዘይተማህረ ሕብረተሰብ ኮይንካ ድኽነትን፣ድንቁርናን ዘዓብለሎ ሕዝቢ ሒዝካ፣ ለውጢ ቀሊል ኣይኮነን። ግን ተቃለስ ሓርን፣ሓደ ተባዕ ፈታዊ ዓዱን ሕዝቡን ፍጠር፣ እዚ ናይ ኮሚኒስት ስርዓታዊ ምሕደራ፣ኮሌክቲቭ(collective leadership)ንየው በሎ። መሕብኢ ለያቡን፣ሰረት ኣምባገነናዊ ስርዓት እዩ።መኸወሊ ገበነኛታት እዩ። ሓደ ደፋር፣ግልጺ ባዓል ሕልሚ (ራኢይ) ትግራይ ናብዙይ ኽወስዳ እደልይ ኣለኹሞ ? ሳዓቡኒ ዝብል መራሒ ፍጠር፣ ኣልሽ። 

እንካ ተባሂሉ ዝዋሃበኻ ስልጣን የለን። ባዕልኻ ብዝኣመንካሉ ኣንፈት ከይድኻ መንዝዓዮ። ኣሕድጎ። መንጥሎ። ዘየኽብረኻ ኣቦ፣ዘይተኽብረኻ ኣዶ ይትታዓገስ። እቲ ንዓኻ፣ንዓኺ ዝግባእ ኽብሪ የብሎምን። ውርደት ንዝደልይ ከም “ክንቲት” ኣቅልሎ።ሓዊ ብሓዊ፣ሰበይቲ ብሰበይቲ፣ወዲ ብወዲ ዶ በሉ ደፋራት። ወዲ ሰብ/ጓል ሰብ ባዕላ ትቀልል።ባዕላ ትሓስር።ባዕሉ ይቀልል።ባዕሉ ይሓስር። 

ወዳሓንኩም

Editor’s Note: The opinions expressed in the articles published on UMD Media are solely those of the individual authors and do not necessarily reflect the views or opinions of the editorial team or UMD Media as an organization. The publication of any opinion piece does not imply endorsement or agreement by UMD Media. Readers are encouraged to critically evaluate the content and form their own conclusions. Leave your comments below. Send us your thoughts and reflections to umd.media.2020 at gmail dot com.

Guidelines for contributors All contributions and comments submitted to UMD Media must adhere to the following guidelines. Respectful Language: Avoid using ethnic adjectives that generalize or portray an entire ethnic group in a negative light. Such language is harmful, divisive, and contrary to our commitment to fostering a respectful and inclusive environment. No Incitement: Content that incites hatred, violence, or discrimination against any individual or group based on ethnicity, race, religion, etc will not be tolerated. Constructive Dialogue: We encourage constructive dialogue and the sharing of diverse perspectives. However, it is essential to express opinions in a manner that respects the dignity and humanity of all individuals and groups. Moderation and Enforcement: Our editorial team reserves the right to moderate and, if necessary, remove any content that violates these guidelines. Repeat offenders may be subject to account suspension or banning. By contributing to our platform, you agree to abide by these guidelines and help us maintain a respectful and inclusive community.

Subscribe to UMD Media channel. Join UMD Media Telegram Channel: https://t.me/UMDMedia